موظفة ما عندك وقت تطبخين تبين طرق مختصرة للطبخ تعالي لا يفوتج

مساء الخير بناتوووو

اكيد اكثرنا هني موظفات وامهات وماعندنا وقت ندش المطبخ ونفنتك او بالاحرى وقتنا محدود مابين الزوج والعيال والمواجيب والدوام وغيره ويدوب اول ماتردين من الشغل تبين شي بسرعة بسرعة يخلص طبعا اللي عندها خادمة تطبخ اتوقع ماراح يكون عندها مشكلة بس اللي ماعندها خادمة او اللي ماتخلي الخادمة تطبخ جد هالموضوع بفيدها وهالموضوع بكتبه من واقع تجربة

شوفي ياقلبي عشان لا تطولين بالمطبخ اكثر من نص ساعة وبالنهاية تاكلين وجبة لذيذة ومفيدة لج ولاسرتج اتبعي هالخطوات وبتستفيدين انشالله

اول شي فضيلج يوم بالاسبوع ساعة زمان على قولتهم

1 اخذي كمية كبيرة من البصل وفرميها بالفرامة ووزعيها بجياس نايلون وقسميها على وجبات والنوع الثاني من البصل قصصيه جوانج وقسميه على جياس نايلون وفرزنيهم

2 عندج الخضار الورقية مثل الكزبرة والبقدونس والشبنت والبصل الاخضر تقدرين بعد تفرمينهم وتتحطينهم بكياس نايلون تفرزنينهم بس طبعا بكونون حق طبخ مو حق سلطة

3 في اكلات تحتاج حمسة ثوم وكزرة حمسيهم سوا وحطيهم باظرف قصدير وفرزنيهم

4 فرمي ثوم كمية كبيرة وقسميها وفرزنيها

5 الكوسا نفس الشي ققصيها وفرزنيها حق حمسات او شوربات والجزر

6 الشوووربات اذا سويتي شوربة وزادت لا تكبينها حطيها بكونتينر وكتبي عليها اسم الشوربة وفرزنيها

7 اذا بتسوين مجبوس لحم عادي سلقي اللحم مع بهاراتج وشغلج وحطيه وخليه يبرد شوي وفرزني اللحم مع المروق بكونتينر

8 الدياي الزايد من الاكل لا تقطينه قصصيه وحطيه ببعلبة صغيرة محكمة الاغلاق بالفريزر حق سندويشات او شوربات حمسات وغيره

9 البييييض في اكلات تتطلب بس صفر بيض مثل السوفليه وبعض انواع الكيك لا تقطين البياض حطي كل بياض بيضة بجيس نايلون واذا صار عند كمية حلوة اقب شي 4 سوي منه ميرانغ او بافلوفا

10 الحمسات الزايدة لاتقطينها هم فرزنيها واذا احترتي بعشا يدوب ذوبيها بالمايكرويف وحشيها بالصمون مع خس وهالبينو ومايونيز ويمه شبس

11 المعلبات اذا بطلتيها مثل الحمص الفاصوليا الذرة الزايد حطيها بعد بجياس نايلون وفرزنيها

12 الطماااط الفريش اذا حسيتي انه جريب يخترب نظفيه عدل وطحنيه وفرزنيه بعلب حق دقوس او مارينارا صوص

13 اذا ودج تسوين بسكووت او بيتيفور بالبيت تقدرين قبل بشهر او اكثر تسوين عجينتج وتفرزنينها وقبل بيوم خليها تفج بالثلاجة واستخدميها ثاني يوم

14 الكيك الزايد فرزنيه وقبل الاستخدام طلعيه قبل بساعة و سوي منه طبقات كيك مع كريمة او ترايفل

15 المووز اللي جريب يخترب او اللي تصير قشرته غامجة ماراح يحبونه اليهال بس انا احبه وايد احس يصير سويييت ولذيذ سوي منه كب كيك او خبز بالموز حق اليهال


واذا تذكرت شي انشالله بقولكم